Sabado, Hulyo 03, 2004

Papel, Pagsusulit, Handaan, Cramming, at Artista

Masaya ngunit nakakapagod ang nakaraang dalawang araw, kasama ang araw na ito. Kahapon ay maaga akong gumising para hanapin ang isa sa mga kailangan kong mabasang maikling kuwento ngunit hindi ko siya makita sa aklatan. Asar.

Pagkatapos noon ay pumunta ako ng McDo para sa meeting ko kasama si Hanniel at ang apat pang kalupon para sa papel na dapat naming isulat para sa Theology ni Fr. Dacanay. Ibibigay din iyon sa Lunes. Kanina rin lamang ay natapos ko na din siya at in-email ko na rin siya sa mga dapat magtagpi-tagpi ng papel.

Dumeretso kami ni Hanniel sa Ateneo para kunin ang Guidance Test. Sa ikalawang palapag ng Kostka ang pagsusulitan namin. Marami nang naghihintay sa tapat ng mga silid-aralan. Pagkatapos ng ilang sandali ay pumasok na kami sa silid at nagsimula na ang pagsusulit. Yung unang eksamen ay kakaiba. Hindi ko alam kung anong ibig sabihin sa mga resultang nakuha ko. Ang pangalawa naman ay isang pagsusulat. May ipapakitang larawan at mula doon ay gagawa ka ng isang kuwento sa loob ng sampung minuto. Simple lang kuno. Bilang manunulat ay kulang ang sampung minutong iyon. Hindi ko natatapos ng maayos ang mga munting kuwentong ginawa ko. Asar. Pagkatapos noon ay nagsama-sama na kami para sa libre nina Yumi at Cerz, kakalipas lamang ng kanilang mga kaarawan at kahapon sila nagpakain.

Naghintay rin kami ng matagal dahil wala pa ang sina Chino, Kim at Billy. Kasama sa kainan ay sina Darls, Jay, Chika, Loi, Edlyn, Hanniel, Jace at iba pa. Pasensiya na. Makakalimutin ako. Sina Kim at Chino kasi ang magbibigay ng sakay para sa amin papuntang Eastwood, o Silangang Kahoy. Kakain kami sa Fazoli’s, isang kainang Italyano.Dumating si Kim ng mga alas singko habang dumating si Chino ng mga alas singko y medya ng hapon.

Manonood sana kami ng Spider-man pero puros puno na ang mga sinehan hanggang alas onse ng gabi. Nakita namin si G. Lozada, ang dati kong guro sa History 18, pababa mula sa sinehan ng Eastwood. Kaya naghintay na lamang kami muna sa plaza dahil alas syete pa ang reserba ng kainan. Dumating din naman kaagad si Ryan. Kasama si Jay at si Ryan, pumunta kami sa bagong paaralan ni Ryan, ang Thames. Malapit lamang iyon sa Eastwood. Maliit lamang ang gusali. Mga ilang daan din lamang ang mga estudyanteng kasyang magklase sa iilang silid nito. Tumingin din kami sa isang tindahan ng mga libro. Pagatapos ng aming paggagala ay bumalik na kami sa piling ng mga kasama naman.

Kumain kami ng masagana. Masarap ang pizza ng Fazoli’s ganoon na din ang pasta. Nakakaumay nga lang iyung napili kong pasta. Humabol si Abet, ang TNT namin noong OrSem.

Masaya ang mga pag-uusap namin. Mga pagpapatawa at pag-alala. Hindi ako nagtagal. Nauna na kami nina Jay at Ryan. May gagawain pa akong takdang-aralin at maaga pa kanina ang aking klase. Sakay kami a sundo ni Ryan at ibinaba kaming dalawa ni Jay sa overpass sa may Gate-2 ng Ateneo.

Masaya ang Fil 119.2. Madami akong natutunan para lumago ang aking sining. Mabuti nalang at hindi nagsulit tungkol sa babasahin. Kagaya nga ng sinabi ko, hindi ko nakuha yung isa sa dalawang dapat kong basahing kuwento.

Kanina lamang ay nakita ko si Claudine Barretto sa National Bookstore ng Katipunan. Noong napatingin ako sa kanya ay hindi ko namukhaan siya. Kakaiba ang hitsura niya sa personalan. Nalaman ko nalamang na siya iyon nang kausapin niya ang kanyang kapatid, ata, at narinig ang kanyang boses. Siya nga iyon. Ang puti niya, hindi natural. Sobrang puti.

Walang komento: