Uy, nakapag-update

1.

Dalawang bagay lang naman talaga ang kumain ng aking panahon sa nakalipas na tatlong buwan: pagtuturo at tesis. At madalas ay nasapawan pa ng tesis ang pagtuturo. Mabuti na lang at nakahabol na ako sa pagtsetsek ng mga papel at nakapagpaskil na ng prefinal grade. (Yehey!) Kaya ngayon balik tesis na ako.

2.

Katatapos ko lang magtanggol ng tesis ko noong isang Martes at ngayo'y rerebisa ang inaatupag ko. Okey naman ang naging pagtatanggol. Nakulangan lang ang aking mga mambabasa (salamat ulit sa kanila) sa aking ginawang intro. Hindi ko kasi masyadong nabago ang nauna kong intro para sa proposal. Komento nga e pang proposal ang intro at hindi para sa pagtatanggol. Kaya pinarebisa sa akin. Natapos ko na ito noong Biyernes. Ang inaatupag ko ngayon ay ang editing ng mismong mga kuwento. Madami pa rin kasing mga typo. Paspasan kai ang paggawa. Sana'y matapos ko ang rebisyon sa loob ng linggo. (Sinong gustong magload? :P) Hanggang sa susunod na linggo pa ang deadline ang pasahan pero mabuti na ring tapos na ang mga rebisyon at edit para mga papeles na lang ang kailangan kong atupagin. Basta, ga-graduate ako kahit na hindi ako magmartsa!

3.

Kahapon, bumili kami ni Dad ng DSLR para sa akin. Advance congratulations gift siguro. Basta, hindi porke may DSLR ako, photographer na ako. Nakakatuwa lang at hindi ko na kailangang hiramin ang Nikon D90 ni Mae, pero feeling ko na mas maganda pa rin na camera ang D90 kumpara sa nabili ko. A, basta, may DSLR na ako. Iyon na iyon.

4.

Kaya iyan, hindi ko pa rin feel na magbabakasyon na. Wala pa rin ako sa vacation mode. At wala talaga akong mga plano para sa tag-araw. Maliban sa tapusin na ang sinimulan sa tesis at magsulat ng isang libro. (Umaambisyon.) At pagbabasa ng mga libro. At paglalaro ng videogames. At panonood ng pelikula. At pagtulog. At kumain. Pero siyempre, wetaminit, may TAPAT pa nga pala. At siyempre, pinakahihintay ko rin ang paglabas ng UBOD. At, oo nga pala, boboto nga pala ako. Ang dami palang gagawin sa tag-araw.